نفّ المطر راشد شرار      –      الإمارات

 على نف المطر قلبي هزف والزّين عدّالي

أخذ له مالمطر طهرٍ ولاح البرق في خدّه

حبيبي للمطر صورة على الخفّاق همّالي

غرا عيني سقى قلبي وأروى الروح من قدّه ؟

هذاك اللي مـعـه تـتـحـقّـق احلامي وآمالي

وذاك اللي جسور الحب له مالقلب ممتدّه

هو الكامل هو الوافي هو المفنود والغالي

على مـر الزمن ما شفت لا هجره ولا صدّه

يسولف لي واسولف له ويسألني عن احوالي

فلا العاذل حجب حبه ولا صرف الزمن حدّه

ترافقني أحاسيسه و أنا ضمّيته لْحالي

هو أول واخر احبابي ولو كل البشر ضدّه

سما حـبّـه عن العالم معاي ومنزله عالي

أعـادي كل عدوانه واقــدّر كل من ودّه

لأنّه غير في طبعه ولنْه الـحـاكـم الوالي

ولنّه في عيوني ما انلقى فوق الثرى نـدّه

أحبه والمحبة سامية وأعنيه بـاقوالي

دخل جوفي وباب القلب عن كل الملا سدّه

عساني ما انحرم قربه وأشوفه دايمًا سالي

معاي ودايمٍ ايدي تذوب بحب في يدّه