يا هاجسي من وافي الشعر وفّه
أعذب سلامً من ندى عطره يفوح
روحي تحفّا و المشاعر تحفّه
من الغلا جاوب له القلب بوضوح
إرشيفي من العام طاوي ملفّه
و ماريت من فتح الملفّات مصلوح
تشكين وتضيق النفوس الاعفّه
و ما للسنّا شمسً…و لا للقمر ضوح
و ما للجفن من ساهر العين رفّه
يبحر بها الهاجس و يقطع بها اسيوح
امداده سطور الورق ما تجفّه
يِروى من الخافي على جال مفضوح
و النفس من دنيا العنا مستعفّه
ما عاد نرجي من ورى الوقت مربوح
يوم الليالي بعبرتي مستخفّه
ما تدري إني باقيٍ من عرب نوح
لي ضايقوه الجاهلين المسَفّه
خيّبهم اللي بالبحر مجري اللوح
بالله رجانا و العزم نستشفّه
من غيمةً هلّت و من بارق يلوح
و عقب اليباس الروض تخضّر كفّه
و يغرّد القمري على يانع الدوح
لا بد من يوم البشاير تزفّه
يشرق على غايات و أفراح واطموح
جميل جدا …دام الابداع