علّمت روحي بكل ألوان العذاب…
نقّصت ضحكي ، زدت دمعة عالحساب…
لقيت الدني مرايي عا كف مصوّرا…
خط الفرح عا قد خط الإكتئاب…
و الأرض كل الأرض نقطة بمحبرة…
بغابة حكايي ملمّعا للجوع ناب…
شاعر مرق بالريح هزّ صنوبرة…
و وقّع كَرِز عالفهرس بقلب الكتاب…
الحظ شب مهفهف، الصدفي مرا…
ظلّين ملح بيلهتوا بحلقة سراب…
و العمر بالإيام غيمة عابرة…
تحت الشمس عا قد ما يغيّر تياب…
بكرا الهوا المارق بِ أوضة مسكّرا…
بيعلّقوا تذكار بِ خزانة غياب…
يا ناطرين البحر يقرش سِكّرا…
و فورة الموج تنمشوا بْ حب الشباب…
شو ما مسحتوا تراب، عن هالجوهرة…
بعد النهر ما يفل و يسكّر بْواب…
بدو يجي صيّاد بطنو مقبرة…
يطوي الشبك و يضبّها تحت التراب…
