“فلسطين”  أمل ناصر    –    لبنان

شو شفتي قولي الأخبار

غزة بعدا تحت النار؟

قلتلن:

قلتلن غزة بالنار

أطفالا صاروا شِيَّاب

وشيوخا تركوا هالدار

ولحقوهن أحلى الشباب

وبيوتُن صارت دمار

لا في حيط ولا في باب

شفت الأب لْ حامل كيس

بْقلبو أشلاء ولادو

وشفت الإم بستغيث

ولادا قداما نْبَادو

وشفت البطل لْ عَم بيموت

وهوِّي كابسْ عَ زنادو

شفت الناس لْ عَم بتموت

 عَ وجوهُن رحمة الله

وكيف عَم توقع هَالبيوت

عَ روس العالم كِلا

وشفت القهر لْ متل الحوت

نتفة شفقَه ما خلَّا

شفت الرجَّال لْ حامِل

ع إيدو بنتو ماتت

بيحكيها..وموتا هَامل

وهي بِسْكوتا فاتِت

بتفكِّر عقلو كامل

أو يمكن عقلو شَاتت

شفت الضمير لِّ مات

وإنسانية معدومي

وشفت القصف لْ متل خْوات

عَ هالناس المحرومي

وشفت الظلم بْها الحياة

وشعب حقوقو مهضومي

شفت وْلاد بتبكي دم

دمُّن.. دمعُن مخلوطين

وشفت المسعف عم بيلِمْ

وجع الناس المحروقين

وشفت حْجاره عَم بتضُم

قلوب بْقلبا معجونين

كل هيدا وبعدُن ثوار

والعزيمِة مجموعَة

وبعدا قلوبن متل النار

وكلمتهن شو مسموعَة

وبعدو إيمانُن جبار

وراية عزن مرفوعة

إنتو يا شعب فلسطين

إنتو القدوة واليقين

الله معكم الله يعين

وينصر أهلك يا فْلسطين!